القصه الجزء الاول
عايلة اسيل
إسم ابوها عادل50
امها شريفه44
أخوها الكبير ابراهيم23
الوسطي ناصر21
الصغير عبدالله19
البنت اللي اصغر وحده أسيل عمرها18
دلوعة ابوها و دايماً يسويلها اي شي تبيه طبعاً اهيه هالسنه آخر سنه لها عشان تتخرج و هالفتره كان عندها راحه لمدة شهر عشان تذاكر ويكون بعدها امتحانات آخر السنه و كله تفكر انها اتييب نسبه واايد عاليه
و هذا الشهر وكانت مسويه جدول حق دراستها كل جمعه و سبت تطلع تدرس بره مع رفيجاتها و مره من الأيام كانت قاعده بالكوفي شوب تدرس اهيه و صديقاتها اللي اهما اسمهم حوراء و شوق و فاطمه
و فاطمه كانت كل ما تروح تقز فاطمه تحاول تخلي رفيجاتها يقزون طبعاً و بهاليوم كانت مواعده واحد اسمه مشعل و كامل و الكامل الله لكن فيه عيب وااحد إنه يچذب ع البنات و أول ما جاء عند الكوفي شوب شاف وحده خذت قلبه و عقله من شافها قاعد يفكر و يقول معقوله هذي البنت اللي كنت أشوفها بالحلم و طبعاً فاطمه واعدته عشان يضحك على منو أسيل اللي من شافها نسى كل شي حوله طبعاً كان يشوفها من بعيد يقول البنت اللي قالتلي عنها فاطمه يا ترى من تطلع اللي لابسه بيج و لا أزرق و لا الحلوه أم أحمر
چان يروحلهم
مشعل : السلام عليكم
فاطمه و البنات بصوت واحد :و عليكم السلام
فاطمه: اعرفكم على بعض مشعل هذيل حوراء و شوق و أسيل و هذا صديقي مشعل
مشعل و اهوه يشوف أسيل بنظرة إعجاب:هلا و الله
مشعل:فاطمه أبيچ شوي بكلمچ
فاطمه :عن إذنكم بنات. هلا والله خير أكيد بتشوف البنت اللي بنلعب عليها
مشعل : إي نعم أبي اعرفها منووووو
فاطمه: أسيل
مشعل : انزين شمعنا على هذي ليش ما تخافين عليها مو صديقتچ
فاطمه و اهيه منصدمه على كلام مشعل: اشفيك انته الحين كل البنات اللي رافچتهم إنت ما قلت عنهم چذي الا هذي اشمعنا إنت تعرفها
مشعل: لا يبه لو اعرفها چان اعرفتني
فاطمه: المهم إنت اقعد و سولف معاها
راحو وقالهم ممكن أقعد چان تقوله أسيل طبعاً اهيه حبته مثل ماحبها :حياك اقعد المكان مكانك
مشعل مشكوره
طبعاً اهما طالعين الساعه ٥ والحين الساعه ٩ حان وقت اسيل انها تروح البيت
و راحت چان يلحقها مشعل و عند سيارتها قالها: أسيل ممكن رقمچ
أسيل :ليش مشعل انا اتأخرت ع البيت لازم امشي الحين عشان
مشعل: قاطعها بس انا احبچ من شفتچ نسيت كل شي مقدر اعيش بدون لا أسمع صوتچ او اشوفچ
أسيل كسر خاطرها و عطته رقمها
اول ما وصلت البيت ادخلت غرفتها و دقت عليه
اول ما شاف الرقم حس انه وايد كان غلطان انه بيلعب عليها
فاطمه خوفها انه يحبها صچ لإنها واايد حلوه
و رد عليها و قال: هلا والله بالطش و الرش
اسيل: مشعل ترى انا وصلت
مشعل: ادري
اسيل :انت شدراك
قلبي قالي انچ وصلتي و كملو بمكالمتهم و كان صوت و كلام مشعل جذب اسيل
إنشالله راح أكملكم القصه
انتظروا الجزء الثاني
باقي اسبوع ع الامتحانات وما زالت اسيل تفكر بمشعل شلون ماراح تسمع صوته بوقت الامتحانات
لإنه مشعل وصاها انه ما تكلمه بوقت امتحانات لإنه يبيها تنجح و تكون سعيده و فرحانه
ومرت الايام و خلصت امتحاناتها و واعدها مشعل بمكان عشان يقولها عن كل شي قالتله فاطمه
و قالها السبب اللي خلاه يشوف فيها اسيل بس اسيل ما كانت مهتمه بفاطمه و خرابيطها اللي ودها تعرفه ان مشعل يحبها و لا يچذب عليها
مشعل : تدرين ان انا من شفتچ حبيتچ و ما همني كلام فاطمه
اسيل: هذا اللي كان ودي اسمعه منك
مشعل انصدم ما صدق انها بتقوله هالحچي: انتي من صجچ انا على بالي بتهديني و تروحين
اسيل: انا لازم اشكر فاطمه لإنها قربتنا مع بعض
مشعل:انتي مو صج المفروض اتزفينها لانها بتلعب عليج
اسيل: عادي ازفها و اشكرها بنفس الوقت
أسيل دقت على فاطمه: سلام
فاطمه: و عليكم السلام
اسيل : مشكووووووره و الله يسامحچ
فاطمه : على شنو
اسيل مشكوره لإنچ خليتيني احب مشعل و الله يسامحچ لإنج كنتي بتلعبين فيني ع فكره بعد اسبوع بيخطبني
فاطمه منصدمه : بيخطبچ!!!!!
اسيل باي و اتمنى اتحضرين ملچتنا مو انتي صديقتي اللي احبها و تحبني باااااي
طبعاً اسيل واايد طيبه ما تحب تخسر اي شخص اتحبه حتى فاطمه اللي ضرتها ما زعلت عليها لانها تحبها
فاطمه :باي
فاطمه اتصلت على مشعل و قالتله: إنت من صجك بتخطبها
مشعل : اي ليش اعتبريها لعبه مثل ما تبين يا الله بااي
فاطمه : هين يا مشعلوا
دزت فاطمه حق مشعل مسج و قالتله:ترى أسوول اعزمتني على الملچه انا راح أحضر عشانها
يوم قرأ مشعل المسج عصب و دز حق اسيل مسج:حبيبتي ليش عزمتي فاطمه
اسيل: إنت شفيك هذي رفيجتي
مشعل و بكل عصبيه:انزين رفيجتج هذي اهيه اللي ضرتچ
اسيل : ههههههه
مشعل : تضحكين على شنو
اسيل : ع بالك بخليها اتيي بلاش
مشعل مستغرب من تصرفات اسيل :اشبتسوين
أسيل: ابيها تشوفنا مع بعض
مشعل : عجبتيني بتصرفچ
اسيل: المهم حبيبي إنت منو عازم ع الملچه
مشعل : الأهل و رفيجي ضاري ضاري هذا صديق عمري
راح مشعل حق بيت اسيل و خطبها من اهلها
يوم السبت الملچه و اليوم يوم الأثنين
يعني باقي ع الملچه٥ايام
و اسيل كانت واايد مشغوله بالأغراض و بنفس الوقت مستانسه
مشعل كان يوم الثلاثاء و رايح البحر عشان قاعد يفكر بفاطمه اشبتسوي اذا يت الملچه و يحاتي واايد
خلصت اسيل اغراضها يوم الاربعاء و اتصلت على خطيبها چان يدخل عليها ناصر و صكرت تليفونها و يقولها:مبروووك يعني من السبت مراح نشوفچ بصراحه الله يعين مشعلووه عليچ طبعاً ناصر كان يضحك معاها يتغشمر
اسيل : لا حبيبي انا و مشعلووه هذا اللي مو تارس عينك حبايب و نعرف بعض زين يعني مو اول مره بنكون مع بعض
ناصر: امبييه انتي شنو ما تخافين بليلة عرسچ انا اللي اعرفه كل البنات يخافون اذا راحو عن اهلهم
اسيل: اشقالولك حبيبي من شاف مشعل عمره ما يخاف
ناصر:خلاص يبه مشعل ارقوووز ههههه
اسيل: احترم نفسك و يا الله بنام
ناصر:بتنامين و لا تتصلين عليه
اسيل :بنام
ناصر: المهم مالي شغل فيكم لو تتناجرون هذا مو شغلي
اسيل :اكيد مو شغلك
ناصر :تصبحين ع خير
اسيل :و انت من اهله
انشالله بكملكم الجزء الثالث
طبعاًً اسيل اول ما راح نصور اخوها اتصلت ع خطيبها و قالت: قوه مشعل
مشعل:هلا و الله بخطيبتي
اسيل: ها وينك شكلك طالع
مشعل:اي طالع البحر قلت بريح شوي
اسيل:ليش كنت متضايق من شي
مشعل: حبيبتي انا ما اقدر اخش عنچ شي بصراحه كنت قاعد افكر بفاطمه اخاف تسوي شي و تفضحچ
اسيل:لا لا فطوم كلش مو چذي معاي
اليوم يوم الخميس و اسيل كانت قاعده تقرا الجريده و شافت خبر وفاة من شخص عزيز عليها
تتوقعون منو كان الشخص اللي توفى.
.
.
.
.
.
الشخص اللي توفى فاطمه و كانت كاتبه كلام بورقه قالت لأمها تعطي الورقه اسيل و طبعاً امها ما فچت الورقه لإنه فاطمة أمنت لأمها انه محد بفچ الورقه غير أسيل
اسيل راحت حق بيت فاطمه عشان تعزي على ام فاطمه اول ما راحت عزت أم فاطمه
اسيل: عظم الله اجركم
ام فطمه :اجرنا و اجرچ جزاچ الله ألف خير
أسيل: خالتي انا أسيل صديقة المرحومه
ام فاطمه :عيل هاچ الورقه فاطمه و صتني اني اعطيچياها و قالتلي ان ملچتچ يوم السبت و قالتلي بعد قوليلها انها تحبچ واااايد
اسيل تضايقت واايد لإنها كانت بتسوي شي حق فاطمه لما قالت حق مشعل مايصير اتيي بلاش
اول ما ردت البيت فچت الوذقه و كان مكتوب عليها
بسم الله الرحمن الرحيم
الى صديقتي اللي احبها واايد… أسيل
اسيل انا اسفه لإني كنت بضرچ بس صدقيني اني احبچ والي يضرچ يضرني الله يخليچ ساامحيني اذا ما سامحتيني منو عيل بسامحني الله مراح يسامحني على اللي سويته معاچ الله يهنيچ و ماوصيچ على مشعل و قولي حق مشعل انه فاطمه مسامحتك و لا تأذي أسيل أحبكم واااايد و مبرووووك حبايبي
أختچ فاطمه
اسيل وايد تضايقت و بنفس الوقت استانست لإنه فاطمه مسامحتهم
اسيل دقت على مشعل و قالتله عن كل السالفه و ان فاطمه مسامحته
اليوم يوم الجمعه و اسيل و مشعل كانو قاعدين يتزهبون ع الملچه و ماكانوا يحاچون مع بعض لإنه باچر الملچه
اليوم يووم الملچه مشعل كان متحمس انه بيشوف اسيل و اهيه لابسه الأبيض
و طبعاً اسيل بعد كان ودها تشوف مشعل و اهوه لابس البشت الأسود
يت حوراء اهيه و شوق عشان بيزفون العروس مع امها و طبعاً حوراء و شوق صديقات اسيل من عمر
اسيل:بنات انا خايفه واايد
حوراء: اكيد بتخافين حبيبتي هذا طبيعي كل عروس تحس فيه
اسيل: بس انا مو خايفه من مشعل خايفه من الناس بيكونون واايد و كلهم بيخزوني
شوف و اتغشمر: ليش مجربه من قبل ههههه
اسيل: سكتي سكتي حوراء شوفيها سكتيها لو انا المسكه هذي مو بيدي چان
شوق قاطعتها : اشبتسوين يعني انا اقولچ چذي عشان ماأبيچ اتحاتين و تخافين
حوراء :شوق خلاص سكتي خليها
اسيل:حوراء فيه وايد ناس
حوراء: لا مو وايد بس امچ و ام مشعل و خواته ثلاثه و خالة مشعل و بناتها خمسه و جارتكم ام محمد و وحده اسمها ام ضاري
اسيل: اي ام ضاري اتكون ام رفيچ مشعل
اسيل :انزين كل هذيله اللي قلتيهم مو واايد لا واايد تدرين عاد خوفتيني زياده
ام ابراهيم اللي اهيه ام اسيل: حبيبتي جاهزه
اسيل : اي يمه جاهزه
انزلت العروس و كانت واايد حلوه اتينن بمعنى الكلمه
و دخل المعرس و كان وايد مستاتس
مالا داعي اتعرفون اشصار بالعرس بقولكم اول ما راحو المعاريس و خلص العرس
اليوم يوم الأحد و طلعوا المعاريس
اول ماردوا من المطعم مشعل كان مسوي مفاجأه اول ما دخلوا البيت اسيل لقت على سريرها تذكرة سفر
كان امنيتها انها تروح هذي الدوله أسبانيا لمدة شهر و هذا كان شهرهم العسل و الله يهنيهم
و خلصت القصه
موضوع: قصة اسيل و مشعل كويتيه انا مؤلفتها و اتمنى تنال اعجابكم 
الأربعاء سبتمبر 14, 2011 2:03 pm
